अक्कलकुवा तालुक्यातील खापर येथे कृषी विभागाने धाड टाकून दोन लाख चार हजार रुपये किमतीचे कपाशीचे बोगस बियाणे जप्त करण्यात आले आहे. सदरची कारवाई परिविक्षाधीन अधिकारी पुलकित सिंग (भाप्रसे)यांच्या उपस्थितीत कृषी विभागाच्या पथकाने केली. याप्रकरणी गुन्हा दाखल करून बियाणे जप्त करण्यात आले आहेत.
खापर ता अक्कलकुवा येथे मे.मिराई ऍग्रो एजन्सी या या बियाणे विक्रेत्यांकडे अनधिकृत एच.टी.बी टी. कापूस बियाणे वाहतूक, साठवणूक व विक्री होत असल्याबाबत कृषी विभागाच्या अधिकाऱ्यांना गुप्त माहिती मिळाली . त्या आधारे जिल्हा भरारी पथकाने मे.मिराई ऍग्रो एजन्सी खापर येथे सदर दुकानाची तपासणी केली असता दुकानाच्या तिसऱ्या मजल्यावर सीलबंद तीन पोते बियाणे आढळून आले. सदर बियाण्याबाबत दुकानाचे मालक गणेश मनोज मराठे यांना विचारले असता त्यांनी उडवाउडवीची उत्तरे दिली. भरारी पथकाने सदर पोते उघडले असता त्यात २ लाख ४ हजार ४०० रुपये किमतीचे अनधिकृत एचटीबीटी बियाण्याची १४६ पाकिटे आढळून आली म्हणून भरारी पथकातील मोहीम अधिकारी जे.एस.बोराळे यांनी पोलिसांत खबर दिल्याने गणेश मनोज मराठे, मुकेश मोहन मराठे दोन्ही रा. खापर, ता. अक्कलकुवा यांच्याविरोधात अनधिकृत कापूस (एच.टी बी.टी.) वाहतूक, साठवणूक व विक्रीबाबत अक्कलकुवा पोलीस ठाण्यात गुन्हा दाखल करण्यात आला आहे.सदर कारवाई गट विकास अधिकारी पुलकित सिंह यांच्या उपस्थितीत नाशिक विभागीय कृषी सहसंचालक मोहन वाघ, जिल्हा कृषी अधीक्षक तानाजी खर्डे, कृषी विकास अधिकारी प्रकाश खरमाळे यांच्या मार्गदर्शनाखाली भरारी पथकातील अक्कलकुवा तालुका कृषी अधिकारी निलेश गढरी, तंत्र अधिकारी विजय मोहिते, कृषी अधिकारी योगेश हिवराळे यांच्या पथकाने केली.तपास पोनि नरेंद्र भदाणे करीत आहेत.
