जळगाव लोकसभा मतदार संघात तिकीट कापल्यामुळे नाराज असलेले खासदार उन्मेश पाटील यांनी आज शिवसेना ठाकरे गटात प्रवेश केला. त्यांच्या समर्थकांसह त्यांनी शिवबंधन बांधून मशाल हाती घेतली. यावेळी मातोश्री परिसरात एकच जल्लोष करण्यात आला. सत्ताधारी विद्यमान भाजप खासदारांचे पक्षांतर करण्याची ही पहिलीच वेळ आहे.
काल त्यांनी खा.संजय राऊत यांची भेट घेतली. त्यानंतर त्यांनी उध्दव ठाकरे यांची भेट घेतली. यावेळी दोघांमध्ये चर्चा झाल्यानंतर उदया शिवसेना ठाकरे गटात ते प्रवेश करणार असल्याचे बोलले जात होते. ते आज खरे ठरले.
जळगाव लोकसभा मतदार संघात भाजपने स्मिता वाघ यांना उमेदवारी दिल्यामुळे पाटील नाराज होते. काल भाजपने उन्मेश पाटील यांची समजूत काढण्याचा प्रयत्न केला. प्रदेशाध्यक्ष चंद्रशेकर बावनकुळे यांनी उन्मेश पाटील यांना फोन करत नाराजी दूर करण्याचा प्रयत्न केला. पण, त्यांची समजूत काही भाजपला काढता आली नाही. त्यामुळे त्यांनी आज ठाकरे गटात प्रवेश केला.
पक्षप्रवेशावेळी खासदार उन्मेश पाटील म्हणाले, महाराष्ट्राचा स्वाभिमान जागृत ठेवत, भारताला मराठी बाणा दाखवणाऱ्या उद्धव ठाकरे यांच्या शिवसेनेत आज मी प्रवेश करत आहे. मी भाजपा सोडून ठाकरे गटात प्रवेश करत असल्याने मला अनेकजण विचारत आहेत की, उमेदवारी मिळाली नाही म्हणून तुम्ही नाराज आहात का? मी या सर्वांना स्पष्टपणे सांगू इच्छितो की, राजकारण करताना आमदार, खासदार होणं हे एवढंच माझं ध्येय नव्हतं. मी खूप चांगल्या हेतूने काम करत होतो. परंतु, राजकारणात काम करताना, आमदार असताना आज आपण जी शासकीय योजनांची जत्रा पाहतोय, त्याचा पॅटर्न आम्ही चाळीसगावात राबवला होता. दुर्दैवाने त्याला किंमत मिळाली नाही. मी मागणी न करता मला मागील वेळेस लोकसभा उमेदवारी मिळाली. परंतु, यावेळी मला एका भावाने दगा दिला तरी दुसरा भाऊ म्हणजे शिवसेना माझ्याबरोबर आहे आणि याचा मला आनंद आहे.
