नंदुरबार - दि 2 (प्रतिनिधी) शहरातील प्रत्येक रस्ता प्रत्येक गल्ली माणसांनी आणि वाहनाने फुलून गेली ईतक्या प्रमाणात आलेल्या समर्थकांच्या साक्षीने आणि महायुती मधील सर्वपक्षीय नेत्यांच्या उपस्थितीत भारतीय जनता पार्टी, शिवसेना, राष्ट्रवादी काँग्रेस अजितदादा गट, रासप आणि रिपब्लिकन पार्टी ऑफ इंडिया महायुतीच्या तथा भाजपाच्या उमेदवार महा संसद रत्न खासदार डॉक्टर हिना गावित यांनी आज सोमवार दि.22 एप्रिल 2024 रोजी उमेदवारी अर्ज दाखल केला.
नंदुरबार जिल्ह्याच्या इतिहासात प्रथमच कोणा एखाद्या नेत्याची उमेदवारी दाखल करण्यासाठी इतकी अलोट गर्दी उपस्थित राहिली. एक अर्थाने प्रचंड संख्येत उपस्थित राहून आठही तालुक्यातील गावागावातील समर्थकांनी जोरदार शक्ती प्रदर्शन घडवले. महायुतीच्या घटक पक्षांमध्ये अंतर्गत नाराजी असल्याच्या चर्चा घडवल्या जात असतानाच आज प्रत्यक्ष रॅली प्रसंगी मात्र खासदार डॉक्टर हिना गावित यांच्यासाठी सर्वपक्षीय नेते आवर्जून उपस्थित राहिल्याचे पाहायला मिळाले.
उमेदवार महासंसदरत्न खासदार डॉक्टर हिना गावित यांची ही रॅली आज सोमवार दि.22 एप्रिल 2024 रोजी सकाळी 11 वाजता त्यांच्या निवासस्थानापासून म्हणजे नंदुरबार येथील विरल विहार सोसायटीतील खोडाई माता रोड वरून काढण्यात आली. या रॅलीत आदिवासी विकास मंत्री नामदार डॉक्टर विजयकुमार गावित, नंदुरबार जिल्हा परिषदेच्या अध्यक्ष डॉक्टर सुप्रिया गावित, भारतीय जनता पार्टीचे महामंत्री विजय भाऊ चौधरी, आमदार काशीराम पावरा, ज्येष्ठ नेते भूपेश भाई पटेल, आमदार राजेश पाडवी, शिंदे गटाच्या आमदार मंजुळाताई गावित, विधान परिषद सदस्य आमशा पाडवी, माजी आमदार पद्माकर वळवी, माजी आमदार शिरीष दादा चौधरी, लोकसभा प्रभारी तुषार भाऊ रंधे, भारतीय जनता पार्टीचे जिल्हाध्यक्ष निलेश माळी, धुळे जिल्हाध्यक्ष बबनराव चौधरी, महिला मोर्चा अध्यक्ष सविता जयस्वाल, डॉक्टर विक्रांत मोरे व अन्य मान्यवर रॅलीच्या अग्रभागी होते. रस्तो रस्ती फडकणारे पक्षाचे ध्वज, 'पाहिली का गर्दी, राहशील का उभा' यासारख्या घोषणा, वाजणारे ढोल ताशे, मोदी आणि हिनाताई यांचे मुखवटे लावून नाचणारे तरुण- तरुणी हे लक्ष वेधून घेत होते.
महायुती मधील सर्व मित्र पक्षांचे नंदुरबार, तळोदा, अक्कलकुवा, धडगाव, नवापूर, शहादा, शिरपूर आणि साक्री या आठही तालुक्यातील प्रमुख नेते पदाधिकारी कार्यकर्ते मोठ्या संख्येने सहभागी होते.
दरम्यान माध्यमांसमोर आपली प्रतिक्रिया नोंदवताना उमेदवार डॉक्टर हिनाताई गावित यांनी सांगितले की, एवढ्या मोठ्या संख्येने लोक उमेदवारी दाखल करण्यासाठी सोबतीने आले हे पाहून माझी ऊर्जा आणखी वाढली आहे. माझ्या कामावर लोकांनी दाखवलेल्या या विश्वासाच्या बळावर मी पुन्हा उमेदवारी दाखल केली आहे ही उमेदवारी दाखल करताना महायुती मधील घटकांचे सर्व संबंधित नेते आजी-माजी आमदार आवर्जून उपस्थित राहिले म्हणून मी त्या सर्वांचे आभारी आहे.ज्येष्ठ नेते डॉक्टर कांतीलाल टाटिया, डॉक्टर शशिकांत वाणी, जिल्हा परिषदेचे माजी अध्यक्ष भरत दादा गावित, ज्येष्ठ नेते शिवाजीराव दहिते, राष्ट्रवादीचे सुरेशराव सोनवणे, चंद्रजीत भैय्या पाटील व अन्य पदाधिकारी उपस्थित होते
