• आजची गझल • (भाग ६९ )
🌹हृदयाचे वृंदावन केल्यावर🌹
हरणार लढाई जर ...आंदोलन केल्यावर
तर काय बिघडले मी उल्लंघन केल्यावर
मी गूढ कसा झालो, वाचून जरा घे तू
मी आत्मचरित्राचे शब्दांकन केल्यावर
आयुष्य गणित झाले, नुसतीच वजाबाकी
शुन्यास कसे वगळू, पुर्णांकन केल्यावर
कृष्णास समजणे हे, असतेच खरे सोपे
कळले हृदयाचे मी वृंदावन केल्यावर
मी खेळत आहे जे, कळणार तुला नाही
सगळेच नियम जर का! मी पालन केल्यावर
तेव्हा तर जगण्याला, ह्या अर्थ खरा आला
सौख्यासह दुःखाचे आवर्तन केल्यावर
करतोस जगावर तू आरोप कशासाठी
कायम दिसते उलटे शीर्षासन केल्यावर
समीर बापट
मुंबई
=•=•=•=•=•=•=•=•=•=•=•=•=•=•=•=
संयोजक
भरत माळी
मो. 9420168806
=•=•=•=•=•=•=•=•=•=•=•=•=•=•=•=
