पिस्तूल कानपटीवर ठेवून व चाकूचा धाक दाखवत ६७ लाख २० हजार रुपये किमतीचे सोन्याचे दागिने व सोन्याची दिवसाढवळ्या लुट,सराफांत भितीचे वातावरण

 शहादा दि.२४ (प्रतिनिधी) शहादा - बोरद वळण रस्त्यावर तऱ्हाडी ते ठेंगचे गावादरम्यान पिस्तूल व चाकूचा धाक दाखवून १ किलो ४०० ग्रॅम वजनाचे ६७ लाख २० हजार रुपये किमतीचे सोन्याचे दागिने व सोने लुटल्याची घटना दि. २३ मार्च रोजी सकाळी साडेदहा वाजेच्या सुमारास घडली .या रस्ता लुटी दरम्यान सराफा दुकानातील मुनीम व ड्रायव्हर या दोघांनाही अज्ञात दरोडेखरांनी पिस्तुलाचा धाक दाखवीत शिंदखेडा शहरापर्यंत आपल्या सोबत नेले व तेथून ते फरार झाले या रस्ता लुटीमुळे सराफा व्यावसायिकांमध्ये भीतीचे वातावरण पसरले आहे.

          पोलीस सूत्रांनी दिलेल्या माहितीनुसार दि. २३ मार्च रोजी सकाळी दहा वाजेच्या सुमारास पार्थ ज्वेलर्सचे संचालक संजय सोनार यांच्या दुकानातून त्यांचे मुनीम विलास बर्डे (रा टवळाई ता. शहादा व चालक प्रकाश कापुरे, (रा.शहादा) हे नेहमीप्रमाणे (MH 39 J 8138 ) या त्यांच्या मालकीच्या इकोस्पोर्ट कारने अक्कलकुवा, खापर, तळोदा या गावातील व्यापाऱ्यांना सोन्याचे दागिने व सोने देण्यासाठी निघाले होते. सुरुवातीला तळोद्यातील व्यापाऱ्यांना दागिने व सोने द्यावयाचे असल्याने ते शहादा येथून नेहमीच्या मार्गाने पिंगाणे - बोरद बायपास रस्त्याने निघाले सकाळी साडेदहाच्या सुमारास तऱ्हाडी ते ठेंगचे या गावादरम्यान वळण रस्त्याजवळ एक निळ्या रंगाची कार (MH 01 BK - 1449) या कारने त्यांना ओव्हरटेक करीत त्यांच्या कारला अडविले त्या कारमध्ये चार जण बसलेले होते. पैकी तीन जण खाली उतरले त्यांनी मुनीम विलास याला कानाला पिस्तूल लावली व दोघांना सज्जड दम भरताना काहीही हालचाल केली अथवा आरडाओरडआम्ही तुम्हाला गोळी घालून ठार मारू असे धमकावल्याने घाबरलेल्या अवस्थेत ते दोघेही शांत बसले त्यानंतर ते तिघेही दरोडेखोर त्यांच्या कारमध्ये बसले दोघांना मागे बसवून त्यांनी शहादा शहराला वळसा घालून लोणखेडा बायपासन मार्गे सर्वजण शिंदखेडा येथे पोहोचले.शिंदखेडा गावालगत पाटण आशापुरी मातेच्या मंदिराजवळ त्या दरोडेखोरांनी त्या दोघांकडून सोन्याचे दागिने व सोने हिसकावून घेतले शिवाय त्यांच्या जवळील मोबाईल मधील सिमकार्ड काढून घेतले व या घटनेची वाच्यता करू नका अन्यथा आमच्याशी गाठ आहे. असा दम देत त्यांच्या कारच्या टायरची हवा काढून त्यांनी सोबत आणलेल्या निळ्या रंगाच्या कारमधून पोवारा करीत ते चारही दरोडेखोर फरार झाले. घटना घडल्यानंतर मुनीम विलास व चालक प्रकाश हे दोघे दुपारी एक वाजेच्या दरम्यान, शहादा येथे पोचल्यानंतर मालक संजय सोनार यांना आम्हाला पिस्तूल चाकूचा धाक दाखवीत आमच्या जवळील सोने व दागिने अज्ञात चोरट्याने चोरून नेले असल्याचे सर्व हकीगत कथन केली. त्यानंतर संजय सोनार यांनी पोलीस निरीक्षक शिवाजी बुधवंत यांना सर्व घटनाक्रम सांगितला दरम्यान, पोलिसांनी तात्काळ नाकाबंदी करीत पोलीस निरीक्षक बुधवंत यांनी जिल्हा पोलीस अधीक्षक श्रवण दत्त व स्थानिक गुन्हे अन्वेषण शाखेचे पोलीस निरीक्षक किरण खेडकर यांना घटनेची माहिती दिली गुन्हा शाखेच्या पथकाने तात्काळ शहादा येथे येऊन या घटनेचा तपास सुरू केला आहे.शहादा पोलिसात पार्थ ज्वेलर्सचे मुनीम विलास रणसिंग बर्डे यांच्या फिर्यादीवरून या चारही अज्ञात दरोडेखोरांविरोधात २४०/ २०२४ भादंवि कलम ३९४, ३४१ सह भारतीय हत्यार कायदा कलम ३/२५, ४/२५ प्रमाणेप्रमाणे गुन्हा दाखल झाला आहे तपास पोलीस निरीक्षक शिवाजी बुधवंत यांच्या मार्गदर्शनाखाली उपनिरीक्षक प्रवीण कोळी करीत आहेत.